Vatan himoyachilari kuni maktabgacha ta’lim muassasasida va harbiy bilim yurtida ko‘tarinki ruhda nishonlandi

8

14-yanvar – Vatan himoyachilari kuni munosabati bilan Chirchiq shahridagi “Ertaklar dunyosi” nomli maktabgacha ta’lim muassasasida bayram tadbiri bo‘lib o‘tdi.

Tadbirida Chirchiq oliy tank qo‘mondonlik-muhandislik bilim yurti harbiy xizmatchilari, bog‘cha tarbiyalanuvchilari hamda ota-onalar ishtrok etdi.

Bayram tadbiri ko‘tarinki kayfiyatda o‘tkazildi. Unda bolajonlar o‘zlarining she’r, raqs, kuy-qo‘shiqlari va jangovor ko‘rgazmali chiqishlari bilan harbiylarni muborakbod etishdi. Shuningdek “Kichik oshpazlar” to‘garagi a’zolari tank ko‘rinishidagi shirinliklari bilan harbiy akalarini qutladilar.

Bunday tadbirlani o‘tkazishdan maqsad, o‘sib kelayotgan yosh avlodni vatanparvarlik ruhida tarbiyalash, ularni milliy armiyamizga bo‘lgan qiziqishini hamda ishonchini yanada shakllantirishdan iborat.

Shu kuni Chirchiq oliy tank qo‘mondonlik-muhandislik bilim yurtida “Ochiq eshiklar kuni” ham bo‘lib o‘tdi. Tadbirda shahardagi umumta’lim maktabi o‘quvchi yoshlari, mehribonlik uyi tarbiyalanuvchilari ishtirok etdi.

“Ochiq eshiklar kuni” munosabati bilan bilim yurtida amalga oshirilgan islohotlar, harbiy xizmatchi va kursantlar uchun yaratilgan shart- sharoitlar, o‘quv binolaridagi moddiy texnik baza hamda qurol-aslahalar to‘g‘risida to‘laqonli ma’lumotga ega bo‘ldilar.

Tadbirning badiiy qismida tashkil etilgan faxriy qorovul va harbiylarning jang san’ati bo‘yicha ko‘rgazmali chiqishlari yig‘ilganlarda xush kayfiyat baxsh etdi.

Nozima MAMATOVA, Mudofaa vazirligi Axborot va ommaviy kommunikatsiyalar departamenti