Janubi-g‘arbiy maxsus harbiy okrug tasarrufidagi Termiz garnizonida joylashgan harbiy qismlardan birining Madaniyat markazida hududdagi harbiy qismlarda xizmat vazifasini o‘tab kelayotgan harbiy xizmatchilarning turmush o‘rtoqlari o‘rtasida “Balli, ayollar” ko‘rik-tanlovining Surxondaryo viloyati bosqichi bo‘lib o‘tdi.
Mazkur bellashuvda ishtirokchilarning turli sohalardagi bilim va ko‘nikmalari sinovdan o‘tkazildi. “Men namunali harbiy oila bekasiman!” shiori ostidagi tanlovda harbiy qismlar bosqichida g‘oliblikni qo‘lga kiritgan 6 nafar ishtirokchi “Men namunali oila bekasiman”, “Ignadan ip o‘tmasa”, “Baxru bayt” va “Biz To‘maris izdoshlarimiz” kabi shartlar bo‘yicha o‘zaro bellashdi.
Hakamlar hay’ati tomonidan shaffof baholab borilgan ko‘rik-tanlov natijalariga ko‘ra, Nurjamol To‘rayeva 3-o‘rinni, Go‘zal Navro‘zova 2-o‘rinni egalladi. Sarvinoz Karimova esa musobaqaning mutlaq g‘olibi deb topildi. Tanlovda g‘alaba qozongan ishtirokchilar okrug qo‘mondonligi tomonidan diplom hamda qimmatbaho sovg‘alar bilan taqdirlandi.
III darajali serjant Akbar AHMEDOV, Termiz garnizoni
