“ArMI—2022” Xalqaro armiya o‘yinlarining Qozogʻistonda boʻlib oʻtgan “Meridian” hamda “Taktik oʻqchi” yoʻnalishlarida ishtirok etgan oʻzbekistonlik ishtirokchilar yurtimizga qaytib keldi. Islom Karimov nomidagi Toshkent xalqaro aeroportida delegatsiyamiz vakillari tantanali ravishda kutib olindi.
– Bugun biz VIII Xalqaro armiya oʻyinlarining “Taktik oʻqchi ” yoʻnalishi boʻyicha ishtirok etib qaytdik. Toʻqqizta davlatdan ishtirok etgan jamoalar orasida qozogʻistonlik va xitoylik hamkasblarimizdan keyingi 3-oʻrinni qoʻlga kiritdik, – deydi mayor Farxod Egamyorov. – Oʻtgan yilgi natijalarimizga nisbatan bu yil juda yaxshi natijani egalladik. Bizga yaratilgan sharoitlardan unimli foydalangan holda keyingi yilgi natijamiz bundan ham yuqori boʻlishiga bor kuch gʻayratimizni ayamaymiz.
– “Meridian” yoʻnalishida ishtirokimiz faxrli 3-oʻrin bilan yakunlandi. Bu yoʻnalish harbiy topograflar oʻrtasida oʻtkaziladigan uch bosqichdan iborat bellashuv hisoblanadi. Bu musobaqaning otish marrasi boʻlmish birinchi bosqichida eng yuqori natijani qayd etdim va rekord natijani oʻrnatdim, – deydi kapitan Atabek Satimuratov. – Bunday xalqaro musobaqalarda ishtirok etishimiz avvalo doʻstlikni, safdoshlarim bilan bir jamoa boʻlib harakatlanishni hamda oʻzimizga boʻlgan ishonchni kuchaytirishga sabab boʻldi.
Sherzod SHARIPOV, Mudofaa vazirligi Axborot va ommaviy kommunikatsiyalar departamenti