Hadisi sharifda aytilganidek, “Savob ishni har kim qilishi kerak, savob ishni har kun qilish kerak”. Shunday ekan, bu kabi xayrli ishlarni qilish, yaxshilik yo‘lidagi sa’y-harakat uchun bel bog‘lash insonga buyuk shon-sharafdir.
Bugun, 11-oktabr kuni “Keksalar hafataligi” doirasida Qurolli Kuchlari akademiyasi, Mirzo Ulug‘bek tuman hokimligi, Xalqaro politsiya assotsiatsiyasi nogironlarni qo‘llab-quvvatlash fondi hamkorligida I darajali serjant T. Xayrulinaning onasi Nina Nikolayevnaning holidan xabar olindi. Unga nogironlik aravachasi topshirildi.
– 6 yildan beri boshqalar ko‘magisiz yurolmayman, – deydi 81 yoshli Nina Nikolayevna. – Qizim Tatyana Xayrulina 18 yildan beri harbiy xizmatda ishlaydi. Shunga qaramay, ishidan arang ortib menga g‘amxo‘rlik qiladi. Bu aravacha kelgusidagi yumushlarimni osonlashtirishiga ishonaman.
Keksalarning ko‘nglini olish — ulug‘ fazilat! Mehmonlarning kichik sovg‘asi onaxonning ko‘ngliga xush yoqqan bo‘lsa ajabmas.
Azim AXTAMOV,
Mudofaa vazirligi Axborot va ommaviy kommunikatsiyalar departamenti