Oʻzbekiston Respublikasi Mudofaa vazirligi qoʻshinlarida harbiy-amaliy va olimpia sport turlarini rivojlantirish, harbiy xizmatchilar oʻrtasida sogʻlom turmush tarzini targʻib etish, eng sara sportchilarni tanlab olish va ularni ragʻbatlantirish maqsadida Shimoli-gʻarbiy harbiy okrug qoʻshinlarida “Armiya sporti haftaligi” joriy etilib, umumarmiya sport musobaqalari oʻtkazildi.
150 nafardan ziyod sportga mehr qoʻygan harbiy xizmatchilarni oʻzida birlashtirgan umumarmiya sport musobaqalari doirasida ishtirokchilar “Armiya biatloni”, “Tosh koʻtarish”, “Armiya qoʻl jangi”, “Kurash”, “Harbiy-sport kompleksi koʻpkurashi”, “Ofitserlar uchkurashi”, “Otish sporti”, “Pichoq uloqtirish”, “Yengil atletika” va “Badminton” boʻyicha oʻzaro kuch sinashib, metin iroda, matonat va gʻalabaga boʻlgan kuchli ishtiyoqni namoyon etdi.
Musobaqalar Nukus garnizoni markaziy sport majmuasi hamda “Nukus” umumqoʻshin poligoni hududida oʻtkazildi. Har bir bellashuv harbiy okrugning tajribali ofitserlaridan iborat hayʼat aʼzolari tomonidan adolatli baholanishiga alohida eʼtibor qaratildi. Baʼzi bellashuvlarda shaffoflikni taʼminlash maqsadida onlayn rejimda monitorlarga uzatib beradigan kuzatuv kameralari oʻrnatildi.
“Armiya biatloni” musobaqasida ishtirokchilar tekis va notekis relyefga ega boʻlgan maxsus yoʻlakchali marshrut boʻyicha kross yugurishi davomida turli usullarda sport miltigʻidan oʻq otishi va granatani 50 metr uzoqlikdagi nishonga uloqtirishi belgilandi. Mazkur bellashuvda har bir jamoadan uch nafardan harbiy xizmatchi ishtirok etdi.
“Tosh koʻtarish” bahsida harbiy libosdagi paxlavonlar sakkiz vazn toifasida bellashib, dast koʻtarish va siltab koʻtarish usulida 32 kg.li toshlarni oʻzlariga boʻysundirdi.
Sharq yakkakurashlari, boks va milliy kurash elementlarini oʻz ichiga olgan “Armiya qoʻl jangi” bellashuvida har bir jamoadan sakkiz nafar ishtirokchi sakkizta vaznda bellashib, kuch va matonatni namoyish etdi. Mazkur bellashuv Oʻzbekiston Respublikasi huquqni muhofaza qiluvchi organlari federatsiyasi va amal qilayotgan Xalqaro qoʻl jangi qoidalariga asosan tashkil etildi.
“Harbiy-sport kompleksi koʻpkurashi” musobaqasi dasturidan 100 metrga yugurish, turnikda tortilish, 3 km masofani bosib oʻtish va yagona toʻsiqlar yoʻlagidan oʻtishni nazarda tutadi.
Pistoletdan oʻq otish, erkin usulda 3 km.ga suzish, 1-2 km masofaga yugurish mashqlaridan iborat boʻlgan “Ofitserlar uch kurashi” bellashuvi ham bahs va munozaralarga boy boʻldi.
“Otish sporti” musobaqasida merganlik mahoratini namoyish etgan ishtirokchilar amaldagi oʻq otish qoidalariga asosan pistoletdan PM-1 mashqi va avtomatdan AK-1 mashqini bajardi.
Toʻrtta masofadan turib pichoqni nishonga qadash hamda pichoq bilan kata bajarish boʻyicha oʻtkazilgan “Pichoq uloqtirish” musobaqasida harbiy xizmatchilar qoʻl jangi elementlarini bajarib, epchillik, chaqqonlik va mohirlikni koʻrsatib berishdi.
Xalqaro kurash qoidalariga asosan baholab borilgan kurash bellashuvi haqiqiy polvonlar bahsiga aylanib ketdi. Oltita vazn toifasida kurash tushgan harbiy xizmatchilar halol raqobat, chapdastlik va kuchli texnikani namoyish eta olishdi.
“Yengil atletika” boʻyicha musobaqada har bir jamoadan 5 nafardan ishtirokchi qatnashib, 3 kilometrga yugurish, 10 kilometrli krossni bosib oʻtish hamda yarim-marafon, yaʼni 21 kilometr masofaga yugurishni amalga oshirdi.
Yakkalik va juftlik bahslarida gʻoliblik uchun kuch sinashgan badmintonchilar uchta geymda erkak va ayollar jamoalari oʻrtasidagi shiddatli bellashuvlarda bahslashdi.
10 ta musobaqa yakuni boʻyicha ishtirokchilar jami 140 ta nominatsiya boʻyicha yakkalik va jamoaviy tarzda kubok, medal, diplom hamda fayxriy yorliqlar bilan taqdirlandi.
Shimoli-gʻarbiy harbiy okrug matbuot xizmati
