Mudofaa vazirligi “Forish” poligonida xalqaro o‘q otish musobaqasiga start berildi

7

Kecha, 10-sentabr kuni Forish tog‘ dala-o‘quv maydonida Mustaqil Davlatlar Hamdo‘stligiga (MDH) a’zo davlatlarning armiyalari o‘rtasida shtatdagi qurollardan otish chempionatiga start berildi.

Mazkur chempionatda 6 davlat – O‘zbekiston, Rossiya Federatsiyasi, Qirg‘iziston, Qozog‘iston, Belaruss va Tojikiston respublikasidan kelgan harbiy jamoalar ishtirok etmoqda. So‘nggi yillarda respublikamizda xalqaro hamkorlik masalalariga alohida e’tibor qaratilmoqda.

Xususan, harbiy sohada olib borilayotgan xalqaro hamkorlik masalalari rivojlanishning yangi bosqichga ko‘tarilgani yaqqol ko‘zga tashlanmoqda. Harbiy xizmatchilar nafaqat jangovar tayyorgarligi, balki jismoniy tayyorgarligida ham xalqaro maydonda nimalarga qodir ekanini amalda isbotlamoqda.

Chempionatning ochilish marosimida so‘z olganlar ham bu boradagi yutuqlar va erishilgan natijalarga alohida to‘xtalib o‘tishdi. Musobaqa nafaqat g‘oliblarni aniqlaydi, balki harbiy xizmatchilar o‘rtasida hamjihatlik, do‘stona munosabat, o‘zaro tajriba almashish imkoniyatini yaratishi bilan ham ahamiyatlidir. Bunga urg‘u bergan ma’ruzachilar barcha ishtirokchilarga muvaffaqiyat tiladilar.

Tadbir davomida Vatan himoyachilarining jangovar tayyorgarlikni o‘zida aks ettirgan ko‘rgazmali chiqishlari, yoshlarimizning turli sport yo‘naishlaridagi sahna ko‘rinishlari namoyish etildi. Qurolli Kuchlar Markaziy ashula va raqs ansambli hamda Mudofaa vazirligi markaziy harbiy orkestri jamoalarining konsert dasturi musobaqa ishtirokchilariga ko‘tarinki kayfiyat baxsh etdi.

– Sport tinchlik elchisi. MDHga a’zo davlatlar harbiy xizmatchilari o‘rtasida yo‘lga qo‘yilgan sport musobaqalari yildan-yilga kengayib, yangi natija va yuqori ko‘rsatkichlarni kashf qilmoqda. Ushbu musobaqalar navbatma-navbat har bir mamlakatda o‘tkazib kelinmoqda. Bu esa harbiy xizmatchilar uchun sohaning yangi bilimlarini o‘zlashtirish, bu boradagi eng so‘nggi yangiliklardan xabardor bo‘lish, shuningdek do‘stona mamlakatning milliy qadriyatlari, urf-odatlari bilan ham tanishish imkonini bermoqda, – deydi belarusslik ishtirokchi podpolkovnik Oleg Malko. – Yurtingizda birinchi marotaba bo‘lishim.

Musobaqaning tashkiliy ishlariga jiddiy tayyorgarlik ko‘rilgani bizni quvontirdi.
Shu kuni musobaqaga qur’a tashlash marosimi ham bo‘lib o‘tdi.

Mudofaa vazirligi Axborot va ommaviy kommunikatsiyalar departamenti