Президент фармойишига биноан 15 декабрдан бошлаб бир ой “Ватанпарварлик ойлиги” этиб белгиланди

657

Ўзбекистон Президенти “Ўзбекистон Республикаси Қуролли Кучлари ташкил этилганлигининг 27 йиллиги ҳамда Ватан ҳимоячилари кунини нишонлашга тайёргарлик кўриш ва ўтказиш чора-тадбирлари тўғрисида”ги фармойишни имзолади.

Фармойишга кўра, Ўзбекистон Республикаси Қуролли Кучлари ташкил этилганлигининг 27 йиллиги ҳамда Ватан ҳимоячилари кунини нишонлашга тайёргарлик кўриш ва ўтказишга бағишланган ватанпарварлик ойлигини 2018 йил 15 декабрдан 2019 йил 15 январга қадар ўтказиш бўйича тадбирлар Дастури тасдиқланди.

Бу сафарги байрам тадбирлари ташкилий жиҳатдан олдингиларидан маънан ва мазмунан фарқ қилиши кўзда тутилган. Уларда миллий армиямизнинг шонли тарихи, амалга оширилаётган ислоҳотларнинг натижалари, мамлакатимиз тинчлиги ва осойишталигини ҳимоя қилишда Қуролли Кучлар салоҳияти, ёшларни ватанпарварлик руҳида тарбиялаш ва баркамол шахс сифатида камол топишида армиянинг муҳим ўрни, ҳарбий хизмат ҳақиқий мардлик, фидойилик, матонат ва садоқат мактаби экани намойиш этилади.

Шунингдек, ишчи гуруҳ ҳарбий-маъмурий секторлар билан ҳамкорликда Дастурда белгилаб берилган байрам тадбирларини “Ватан – муқаддас, уни ҳимоя қилиш шарафли бурчдир!” деган умумий ғоя остида ташкилий жиҳатдан юксак савияда амалга ошириш, давлат ва жамоат ташкилотларининг раҳбарлари томонидан ўзлари таҳсил олган олий таълим муассасалари, академик лицейлар, касб-ҳунар коллежлари ва умумтаълим мактабларида “Мардлик ва жасорат” мавзусидаги дарслар ўтказиши белгиланган.

Хусусан, “Ватанпарварлик ойлиги” давомида “Ҳарбий-ватанпарварлик карвонлари”нинг таълим муассасаларига ташрифини уюштириш, ўспирин ёшлар ўртасида “Мен, албатта ҳарбий бўламан!” танловини ўтказиш, Ёшлар ўртасида “Ҳарбий-ватанпарварлик мавзусидаги “Энг яхши селфи” танловини ташкил этиш, ҳарбий-ватанпарварлик йўналишидаги “Энг яхши маҳалла” ва “Энг яхши Жасорат клуби” танловини ўтказиш каби кўплаб вазифалар кўзда тутилган.

Ўзбекистон Мудофаа вазирлиги юртдошларимиздан Умумхалқ байрами – Ватан ҳимоячилари куни муносабати билан жойларда ўтказиладиган тадбирларда фаол иштирок этишларини, ўсиб келаётган ёшларимизни миллий ифтихор ва Ватанга садоқат руҳида тарбиялашга ўзларининг ҳиссасини қўшишларини сўрайди.

ВИДЕО: https://www.youtube.com/watch?v=w8NanCkcxzc

Мудофаа вазирлиги матбуот хизмати