“Konstitutsiya meniki, seniki, bizniki! Konstitutsiya oʻzimizniki” shiori ostida konstitusiyaviy qonun loyihasi boʻyicha harbiy xizmatchilar va Qurolli Kuchlar xizmatchilari orasida referendum oʻtkazish tartibi, bosh qomusimizning yangi tahriridagi moddalar mazmun-mohiyatini tushuntirish maqsadida keng targ‘ibot ishlari amalga oshirilmoqda.
Xususan, Mudofaa vazirligi Axborot-kommunikatsiya texnologiyalari va aloqa harbiy instituti tashabbusi bilan Mirzo Ulugʻbek nomidagi Oʻzbekiston Milliy universitetida “Inson qadri ulugʼlangan yurt” degan ezgu gʼoya ostida yangilanayotgan Konstitutsiya targʼibotiga bagʼishlangan madaniy-maʼrifiy tadbir oʼtkazildi.
Unda harbiy xizmatchilar, talabalar, oʼquvchi yoshlar, uyushmagan yoshlar, katta-yu kichik yurtdoshlarimiz ishtirok etdi. Tadbir davomida harbiy institut boshligʼining oʼrinbosari podpolkovnik Fayzullo Shermatov tomonidan bosh qomusimizga kiritilayotgan oʼzgartishlarning mazmun-mohiyati, taʼlim rivojiga va kafolatlangan taʼlim sifatiga doir muhim jihatlar xususida maʼlumotlar berildi.
Yangilanayotgan Konstitutsiya nafaqat bugungi, balki kelajak avlod manfaatlariga toʼla xizmat qilishi bilan ahamiyatli ekani taʼkidlanib, 30-aprel kuni boʼlib oʼtadigan referendumda har birimiz ishtirok etib, oʼz fuqarolik burchimizni bajarishimiz lozimligi alohida qayd etildi.
Mayor Sherqoʻzi HAKIMOV, Mudofaa vazirligi Axborot-kommunikatsiya texnologiyalari va aloqa harbiy instituti
