Grossmeyster Nodirbek Abdusattorov kursantlar bilan dona surdi

89

13 yoshidayoq jahonning eng yosh grossmeysteri sifatida tarix sahifalariga muhrlangan o‘zbek yigiti Nodirbek Abdusattorov O‘zbekiston Qurolli Kuchlari akademiyasi kursantlari uchun mahorat darsini o‘tdi.

Avvaliga shaxmatchi va kursantlar o‘rtasida davra suhbati o‘tkazilib, kursantlar Nodirbekning faoliyati haqida batafsil ma’lumotga ega bo‘ldilar. Mahorat darsi davomida yosh sportchiga berilayotgan savollarning keti uzilmadi.

Shundan so‘ng yosh grossmeyster kursantlar bilan dona surdi. Professional shaxmatchi o‘z tajribasini namoyon etib, yig‘ilganlar e’tirofiga sazovor bo‘ldi.

“Nodirbek shahmat bo‘yicha jahon chempioni. FIDE ustasi. 2012-yil Sloveniyada o‘tkazilgan jahon chempionatida va 2014-yil Toshkent shahrida o‘tkazilgan Osiyo chempionatida oltin medal bilan taqdirlangan. 2017-yil xalqaro turnirda uchinchi bor xalqaro grossmeyster talabini bajardi. Iqtidorli yosh sportchining bu muvaffaqiyati jahon shaxmat olami tarixida ikkinchi natija, deya e’tirof etildi”, — deydi Nodirbekning murabbiyi, xalqaro grossmeyster Saidali Yuldashev.

Ta’kidlash kerakki Nodirbekning opasi Bahora ham shahmatda ko‘p yutuqlarga erishgan. Bahora bir necha marta shahmat bo‘yicha o‘tkazilgan respublika va jahon chempionatlarida qatnashib, faxrli o‘rinlarni egallagan. U besh karra O‘zbekiston chempioni, FIDE ustasi. 2013-yili Birlashgan Arab Amirliklarida bo‘lib o‘tgan jahon chempionatida kumush medalni qo‘lga kiritgan. 2013-yil yakunlari bo‘yicha «Osiyoning eng yosh shaxmatchisi» deya tan olingan.

Nodirbek va Bahoraning otasi zahiradagi podpolkovnik Fazliddin Ochilov bo‘ladi. Fazliddin Ochilov ayni vaqtda Qurolli Kuchlar akademiyasida o‘qituvchi sifatida faoliyat yuritmoqda. Fazliddin aka yurtimiz sha’nini jahon arenalarida munosib himoya qilib kelayotgan mana shunday farzandlar bilan faxrlanadi.

Mudofaa vazirligi matbuot xizmati