Oʻzbekiston Qurolli Kuchlari Axloqiy-ruhiy taʼminot konsepsiyasi tasdiqlandi

224

Oʻzbekiston Respublikasi Qurolli Kuchlari qoʻshinlarida axloqiy-ruhiy taʼminot ishlarining samaradorligini oshirish maqsadida qoʻshinlarning jangovar shayligi va jangovar qobiliyatini yuksaltirish, mamlakat tinchligi va osoyishtaligini taʼminlashga, halol harbiy xizmatchilarni tarbiyalashga qaratilgan Oʻzbekiston Qurolli Kuchlari Axloqiy-ruhiy taʼminot konsepsiyasini tasdiqlash toʻgʻrisidagi qoʻshma qaror imzolandi.

Tegishli vazirlik va idora rahbarlarining soha boʻyicha oʻrinbosarlari, harbiy okrug qoʻshinlari va unga tenglashtirilgan birlashmalar qoʻmondonlari, mudofaa ishlari boshqarmalari va boʻlimlari boshliqlari, harbiy qism komandirlari va muassasa boshliqlari mazkur qarorda belgilangan vazifalarning oʻz vaqtida va sifatli amalga oshirilishi boʻyicha shaxsan javobgar hisoblanadi.

Ushbu Konsepsiya Oʻzbekiston Respublikasi Konstitutsiyasi, “Oʻzbekiston Respublikasining Mudofaa Doktrinasi toʻgʻrisida”gi qonuni hamda boshqa meʼyoriy-huquqiy hujjatlar asosida ishlab chiqilgan va Oʻzbekiston Respublikasining harbiy tashkiloti faoliyatining amaldagi qonunchilik va meʼyoriy-huquqiy bazasi asosida Qurolli Kuchlarning harbiy harakatlarini axloqiy-ruhiy taʼminlash sohasidagi qarashlar, asosiy tushunchalar, maqsad va vazifalar, qonuniyat va tamoyillar, yoʻnalishlar, shakl hamda usullar tizimini oʻzida aks ettiradi.

Konsepsiyada Markaziy Osiyo mamlakatlarida inqirozli vaziyatlarni keltirib chiqarishi mumkin boʻlgan ichki siyosiy barqarorlikka tahdidlar, axborot kommunikatsiya makonida Oʻzbekiston Respublikasining suverenitetiga, mustaqilligiga, hududiy yaxlitligiga qarshi qaratilgan hamda aholining tinch hayotiga tahdid soluvchi ehtimoliy mafkuraviy va psixologik harakatlarga qarshi kurashish yoʻllari keltirib oʻtilgan.

Axloqiy-ruhiy taʼminot bu — Qurolli Kuchlar boshqaruv organlari, qoʻmondonlar, shtablar, tarbiyaviy va mafkuraviy ishlar organlari, boshqa boshqaruv organlari va mansabdor shaxslar tomonidan shaxsiy tarkibning har qanday vaziyatlarda qoʻyilgan vazifalarni soʻzsiz bajarilishini taʼminlaydiganyuqori axloqiy-ruhiy holati va boshqa sifatlarini shakllantirish, saqlab turish va tiklash boʻyicha maqsadlari, vazifalari, joyi, vaqti, ketma-ketligi, jalb qilinadigan kuch va vositalari boʻyicha muvofiqlashtirilganharakatlar majmuidir.

Mudofaa vazirligi matbuot xizmati