Regbi-15 boʻyicha Oʻzbekiston chempionatida Mudofaa vazirligi vakillari gʻolib boʻldi

111

Joriy yil noyabr-dekabr oylarida Chirchiq oliy tank qoʻmondonlik-muhandislik bilim yurti hamda Samarqand kichik mutaxassislarni tayyorlash markazi sport bazasida Oʻzbekiston miqyosida erkaklar oʻrtasidagi regbi-15 chempionatining boʻlib oʻtdi.

Mazkur musobaqada jami 8 ta jamoa 2 guruhga boʻlingan holda kurash olib bordi. “A” guruhida Toshkent harbiy okrugi, Chirchiq oliy tank qoʻmondonlik-muhandislik bilim yurti, Qurolli Kuchlar akademiyasi hamda Mudofaa vazirligi sport klubi jamoalari oʻzaro bellashgan boʻlsa, “B” guruhida esa Markaziy, Sharqiy harbiy okruglari, Havo hujumidan mudofaa qoʻshinlari va Harbiy havo kuchlari, Janubi-gʻarbiy maxsus harbiy okrug jamoalari kuch sinashdi.

30 noyabr kuni boshlangan murosasiz bellashuvlarning final bosqichi kecha, 9 dekabr kuni Chirchiq oliy tank qoʻmononlik-muhandislik bilim yurti sport maydonida Toshkent harbiy okrugi hamda Sharqiy harbiy okrugi jamoalari oʻrtasida boʻlib oʻtdi. Qishning sovuq havosi va yomgʻirlar ostida kechgan kurashlarda oʻzining yuqori saviyadagi oʻyinini namoyish eta olgan Toshkent harbiy okrugi jamoasi gʻoliblikni qoʻlga kiritib, chempionlikka erishdi.

“Koʻpchilik regbida faqat kuchli sportchilargina gʻalaba qozonishi mumkin, deb oʻylaydi. Toʻgʻri, jismoniy tayyorgarlik muhim ahamiyatga ega. Ammo regbi jamoaviy oʻyin boʻlib, maydonda har bir sportchining oʻz oʻrni bor. Biz aynan yaxshi tashkil etilgan jamoaviy oʻyin va tezkor harakatlar hisobiga finalga yoʻllanmani qoʻlga kiritdik”, – deydi Sharqiy harbiy okrugi vakili shartnoma boʻyicha harbiy xizmatchi, oddiy askar Ruslan Matqurbonov.

Taʼkidlash joizki, Mudofaa vazirligi qoʻshinlarida 2013 yildan ommalashgan regbi-15 sport turida harbiy jamoalar bir necha bor mamlakat miqyosidagi oʻyinlarda gʻalaba nashidasini surishgan. Oʻtgan yilda ushbu sport turida Janubi-gʻarbiy maxsus harbiy okrug vakillari birinchi oʻrinni qoʻlga kiritgan. 2017 yildan eʼtiboran esa Mudofaa vazirligida olimpia sport turiga kirgan regbi-7 ga ham qiziqish oshmoqda. Jumladan, bu yilgi respublika chempionatida Sharqiy harbiy okrugi jamoasi gʻalabaga erishdi.

Chempionat gʻolib va sovrindorlari tegishli kubog, diplom va faxriy yorliqlar bilan taqdirlandi.

Turnirning yopilish marosimida soʻzga chiqqan Qurolli Kuchlar Bosh shtabi boshligʻining oʻrinbosari – Oʻzbekiston regbi federatsiyasi raisining birinchi oʻrinbosari polkovnik Shuhrat Ikramov barcha ishtirokchilarni qutlab, ularga minnatdorchilik bildirdi va keyingi musobaqalarda omad yor boʻlishini tiladi.

Mudofaa vazirligi matbuot xizmati