Амалга оширилган ишлар сарҳисоб қилинди

10

Юртимизда пандемия шароитига қарамасдан, “Ёшлар куни” доирасидаги тадбирлар Мудофаа вазирлиги Тоифаланган объектларни қўриқлаш қўшинлари қўмондонлиги ҳарбий қисмларида кенг миқёсда ўтказилди. Ёшлар билан ўтказилган тадбирлар карантин талабларига қатъий риоя қилинган ҳолда, Республикамизнинг чекка ҳудудларигача қамраб олинди.

Қўмондонлик бошқарув аппаратида Ёшлар иттифоқи бошланғич ташкилотлари етакчилари томонидан амалга оширилган ишлар юзасидан 2020 йилнинг биринчи ярим йиллиги сарҳисоби ўтказилди. Тадбирда қўмондонликнинг Тошкент шаҳрида жойлашган ҳарбий қисмларидаги 30 ёшгача бўлган ҳарбий хизматчилар, Ўзбекистон ёшлар иттифоқи Тошкент шаҳар, Юнусобод тумани кенгаши раиси Ихтиёр Зиёдуллаев ҳамда бўйсунувчи барча ҳарбий қисмларнинг бошланғич ташкилот етакчилари видеоселектор орқали иштирок этдилар.

Амалга оширилган ишлар юзасидан ҳисоботлар тинглангач, ярим йилликда фаол бўлган ҳарбий хизматчилар қўшинлар қўмондонининг буйруғи билан рағбатлантирилди.

Шунингдек, Бекобод шаҳрида жойлашган бўлинмада ҳам “Ёшлар куни” муносабати билан “Ёшлар ойлиги”да фаол иштирок этган ҳарбий хизматчиларни рағбатлантириш маросими бўлиб ўтди.

Тадбирда ҳарбий қисм командири томонидан ёшлар билан ўтказиладиган тадбирлар фақат июнь ойида эмас, балки йил мобайнида давом этиши зарурлиги таъкидланди.

 Тоифаланган объектларни қўриқлаш қўшинлари қўмондонлиги матбуот хизмати