Bolajonlarga quvonch ulashib

4

Mudofaa vazirligi Toifalangan obyektlarni qoʻriqlash qoʻshinlari qoʻmondonligining Toshkent viloyati, Boʻstonliq tumani, Chorbogʻ qoʻrgʻonida joylashgan harbiy qismi shaxsiy tarkibi tashabbusi bilan Toshkent viloyatida joylashgan “Quyoshli” bolalar oromgohida dam olayotgan bolajonlar uchun maʼnaviy-maʼrifiy tadbir tashkil qilindi.

“Yoshlar oyligi” doirasida oʻtkazilgan mazkur tadbirda ertamiz egalari uchun dastlab qurol-aslahalar namoyishi oʻtkazilib, harbiy xizmatchilar bolajonlarni qiziqtirgan savollarga batafsil javob berdilar. Qurol-yarogʻlarning taktik-texnik tavsifi va qoʻllanishiga oid maʼlumotlarni kichkintoylar zoʻr qiziqish bilan tingladilar.

Harbiy xizmatchilarning qoʻl jangi boʻyicha koʻrgazmali chiqishlarini ham bolajonlar oʻzgacha hayrat va hayajon bilan tomosha qildi. Tadbir davomida “Yoril pufak”, “Kim chaqqon” va “Tez aytish” shartlari oʻtkazilib, unda ertamiz egalari faol qatnashdilar. Shu kuni chorbogʻlik va Toshkent shahridan tashrif buyurgan harbiylar tomonidan kichkintoylarga sovgʻalar ulashilib, oromgoh kutubxonasi uchun ham kitoblar hadya qilindi.

Qoʻmondonlik va Maxsus-avariya tiklash boshqarmasining “Impuls” vokal-instrumental ansambli xonandalari ishtirokidagi konsert dasturi namoyish etilganida, tadbir haqiqiy bayramga aylanib ketdi.

Toifalangan obyektlarni qoʻriqlash qoʻshinlari qoʻmondonligi matbuot xizmati