“Энг илғор мутахассис-кинолог” кўрик-танловининг тақдирлаш маросимида 1000 га яқин ёшлар иштирок этди

17

Ҳарбий хизматчилар ўртасида соғлом рақобат муҳитини шакллантириш, ўзаро тажриба алмашиши ва нуфузли халқаро мусобақаларга муносиб номзодларни саралаб олишда Мудофаа вазирлиги миқёсида ўтказилаётган танловлар муҳим ўрин тутмоқда.

“Энг илғор мутахассис-кинолог” кўрик-танлови ҳам ана шу мақсадда ташкил этилди.

“Энг илғор мутахассис-кинолог” танлови Чирчиқ олий танк қўмондонлик-муҳандислик билим юртида ўтган очилиш маросимида таъкидланганидек, кўплаб махсус топшириқларни бажаришда хизмат итлари ва мутахассис-кинологларнинг ўрни беқиёс. Мудофаа вазирлиги тизимида мазкур соҳани янада ривожлантириш борасида тизимли ишлар амалга оширилмоқда.

Кўрик-танловнинг аксарият босқичлари Тошкент вилояти Мудофаага кўмаклашувчи “Ватанпарвар” ташкилотининг спорт-техник комплексида ўтказилди. Мазкур мусобақалар ёш авлодни юртга муҳаббат руҳида тарбиялаш, бўш вақтларини мазмунли ташкил этишда муҳим ўрин тутмоқда. Бу йил биринчи маротаба ташкил этилган “Энг илғор мутахассис-кинолог” мусобақасининг 1,2-босқичлари ҳарбий қисм ва округлар миқёсида бўлиб ўтди. Саралашларда юқори натижаларни қайд этган 22 нафар ҳарбий хизматчилар ўзларининг хизмат итлари билан ҳал қилувчи финал баҳсларида қатнашди.

Бу каби мусобақалар ёш авлод вакилларини ватанпарварлик руҳида тарбиялаб, уларда ҳарбийлик касби ҳақидаги билим ва таасуротларини янада оширишда ҳам муҳим ўрин тутяпти. Беллашувларни Чирчиқ шаҳридаги умумтаълим мактабларининг ўқувчилари ҳаяжон билан кузатиб боришди.

Танловнинг биринчи шарти “Дог биатлони” бўлди. Унда қатнашчилар яккка тартибда умумий 3200 метр масофага юугуриши керак. 800 метр масофа ортда қолдирилгандан сўнг 1-отиш маррасида ётган ҳолатда милтиқ ёрдамида 50 метр масофадаги 5 та нишон ёпилиши лозим.

Мўлжалга тегмаган ҳар бир нишон махсус жарима майдонида бир айлана югуриш билан жазоланади. Стартдан 2 км 400 метр масофа босиб ўтилгач 2-отиш чегарасида тик ҳолатда ўқ узиш амалга оширилади. Барча иштирокчилар маррага биринчи бўлиб етиб келишга астойдил ҳаракат қилишди.

Эстафетали “Дог биатлон” шарти қизғин ва ҳаяжонли дамларга бой бўлди. Бунда натижа жамоанинг охирги аъзоси маррага етиб келган вақт бўйича баҳоланади. Шунинг учун ҳар бир иштирокчи катта масъулият билан ҳаракат қилиши лозим.

Иштирокчилар “Ҳимоя қоравул хизмати”, “Мина қидириш хизмати” ва “300 метр масофага тўсиқларни хизмат ити билан енгиб ўтган ҳолда югуриш” шартлари бўйича ҳам беллашдилар.

Танловнинг тақдирлаш маросими турли саҳна кўринишлари билан бошланди. Таъкидлаш жоизки ушбу кўрик-танловга бошқа Куролли Кучлар тузилмалари ҳам қизиқиш билдиришди. Улар беллашувларда кузатувчи сифатида иштирок этишди. Мусобақанинг ёшлар тарбиясидаги ўрнини ҳам дайд этиш жоиз. Шу куни маросимда Чирчиқ шаҳрининг минглаб ўқувчилари ҳам қатнашди.

Дастлаб турли номинациялар соҳибларига Мудофаа вазирлиги раҳбарияти томонидан диплом ва эсдалик совғалари топширилди. Шундан сўнг “Энг илғор мутахассис-кинолог” танловида 1,2,3-ўринларни қўлга киритган иштирокчиларга медаллар топширилди.

Тадбир сўнггида ҳарбий хизматчилар томонидан тақдим этилган жанговар саҳна кўринишлари ёшларга бир олам завқ бағишлади.

Бобур ЭСОНОВ, Мудофаа вазирлиги Ахборот ва оммавий коммуникациялар департаменти