Harbiylar “MEGA PLANET” ko‘ngilochar savdo majmuasida bayram kontsertini taqdim etishdi

1

Mudofaa vazirligi Toifalangan ob’ektlarni qo‘riqlash qo‘shinlari qo‘mondonligi harbiy xizmatchilari tomonidan Asosiy qonunimiz – O‘zbekiston Respublikasi Konstitutsiyasi qabul qilinganining 27 yilligiga bag‘ishlangan navbatdagi bayram tadbiri poytaxtimizning Yunusobod tumanida joylashgan “MEGA PLANET” ko‘ngilochar savdo majmuasida bo‘lib o‘tdi.

Mazkur bayram tadbiri Mudofaa vazirligi Maxsus avariya tiklash boshqarmasi bilan hamkorlikda o‘tkazildi. Tadbirda qo‘mondonlik harbiy xizmatchilari tomonidan Bosh qomusimizni madh etuvchi she’rlar o‘qildi, “Impuls” vokal instrumental ansamblining go‘zal kuy-qo‘shiqlari barchaga ko‘tarinki kayfiyat bag‘ishladi.

–  Men ushbu majmuaga kelganimda, tasodifan mana shu kontsert dasturining guvohi bo‘ldim, – deydi pedagogika fanlari nomzodi Risolat Rustamova. – Vatanimiz posbonlari Konstitutsiyamizning

27 yilligiga bag‘ishlangan ajoyib kontsert dasturini namoyish etishdi. Bugungi kontsert, yurtimizda xalq va armiya yakdilligi nihoyatda yuqori darajaga ko‘tarilganini yaqqol namoyon etib turibdi.

Harbiylarimiz tomonidan davlatimizdagi barcha bayramlar, muhim sanalar oldilar mana shunday tadbirlarini o‘tkazish yaxshi an’anaga aylandi. Biz bundan nihoyatda xursandmiz, ushbu tadbirlar yanada ko‘payishini hohlaymiz, chunki bunday tantanalarni ko‘rib, farzandlarimizning harbiy bo‘lishga qiziqishi yanada ortmoqda, qalblarida vatanparvarlik hislari shakllanmoqda. Fursatdan foydalanib, barcha vatandoshlarimizni Konstitutsiyamizning 27 yilligi bilan muborakbod etaman.

Bayram tadbirlari respublikamiz bo‘ylab davom etmoqda.

Toifalangan ob’ektlarni qo‘riqlash qo‘shinlari qo‘mondonligi matbuot xizmati