Mudofaa vazirligi tizimidagi bir guruh harbiy tibbiyot mutaxassislari taqdirlandi

4

“Tibbiyot xodimlari kuni” munosabati bilan Mudofaa vazirligi tizimida faoliyat yuritayotgan harbiy tibbiyot mutaxassislari ishtirokida O‘zbekiston davlat san’at va madaniyat institutida tantanali tadbir o‘tkazildi.

Mudofaa va Sog‘liqni saqlash vazirligi mas’ul vakillari, harbiy shifokorlar, hamshiralar ishtirok etgan bayram tadbiri ko‘tarinki ruhda o‘tdi. So‘zga chiqqanlar zamonaviy tibbiyotning istiqbollari haqida so‘z yuritdi. Shu kungacha harbiy tibbiyot sohasida amalga oshirilgan ulkan islohotlarni e’tirof etishdi. Bunda tibbiyotning rivoji va taraqqiyotida jonkuyar soha xodimlarining xizmati, hissasi beqiyos ekanligini alohida ta’kidlashdi.

Tadbirda bir guruh fidoyi tibbiyot xodimlari Sog‘liqni saqlash vazirining buyrug‘iga binoan “O‘zbekiston Respublikasi sog‘liqni saqlash a’lochisi”, Mudofaa vazirining buyrug‘iga asosan “Yosh avlodni harbiy vatanparvarlik ruhida tarbiyalashdagi faol ishtiroki uchun”, “Namunali xizmati uchun” ko‘krak nishonlari bilan taqdirlandi.

Shuningdek, bir guruh harbiy tibbiyot mutaxassislariga navbatdagi harbiy unvonlar topshirildi. Mudofaa vazirligi tizimida o‘tkazilgan “Eng ilg‘or hamshira” ko‘rik-tanlovining respublika bosqichi g‘oliblariga diplom va qimmatbaho sovg‘alar taqdim etildi.

Qurolli Kuchlar Markaziy ashula va raqs ansambli xonandalari hamda O‘zbekiston davlat san’at va madaniyat instituti talabalari ijrosidagi konsert dasturi tadbirga o‘zgacha shukuh bag‘ishladi.

Mudofaa vazirligi Axborot va ommaviy kommunikatsiyalar departamenti