Ijodkorlar va harbiylar 98 yoshli faxriyning xonadoniga tashrif buyurdi

5

O‘zbekiston Yozuvchilar uyushmasi Farg‘ona viloyati bo‘limi mutaxassisi D.Ergasheva va milliy armiyamiz safida muddatli harbiy xizmatni namunali o‘tab qaytgan A.Abduqodirov hamda bir guruh harbiy xizmatchilar Ikkinchi jahon urushi qatnashchisi 98 yoshli Orifjon ota Mo‘minovning xonadonida bo‘ldilar.

Dunyoda shunday qutlug‘ va mo‘’tabar bir so‘z borki, bu so‘zda hammamizning jonu jahonimiz, borlig‘imiz, hayotimiz mujassam. Bu qudratli va aziz so‘z – tinchlik.

Nainki inson, tog‘ning ulkan cho‘qqisida turgan burgutga ham, polaponlariga tumshug‘ida suv olib uchayotgan qaldirg‘ochga ham tinchlik kerak. Ana shu ulug‘ ne’mat – tinchlikning sababchilari bo‘lmish Ikkinchi jahon urushida mardlik ko‘rsatgan qahramon va bugun millat manfaatlari, yurt faravonligi uchun kamarbasta bo‘layotgan bahodir yigitlarni yonma-yon ko‘rish qalblarni cheksiz g‘urur-iftixorga to‘ldiradi, albatta.

Urushning achchiq zahmatlarini totgan nuroniy osoyishta kunlarning istiqboliga bel bog‘lagan alpomish yigitlarni ko‘rib, ko‘zlari yoshlandi. O‘zbekiston Yozuvchilar uyushmasi Farg‘ona viloyati bo‘limi tomonidan taqdim qilingan kitoblar jamlanmasi Orif otani to‘lqinlantirib yubordi.

Shukrkim, bugun harbiy xizmatchilarning ko‘ksini “Urush qahramoni” degan medal emas, “Namunali harbiy xizmatlari uchun” deb bitilgan nishonlar bezab turibdi. Mana shu ikki avlod vakillariga boqib yurakdagi shukronalik hissi gurkirab ketgandek bo‘ladi, insonning. Ijod ahlida esa sadoqat, jasorat ilmini tarannum etuvchi yangi ilhomlar to‘lqin yozadi.

Eng ahamiyatlisi, bu kabi jasoratni ulug‘lovchi suhbatlar zamirida ertangi tinch, osoyishta kunlarga bo‘lgan cheksiz ishonchimiz yuksalib boraveradi.

Mudofaa vazirligi Axborot va ommaviy kommunikatsiyalar departamenti