ArMI – 2019. Forish poligoni. “Harbiy-tibbiy estafeta” tanlovi ishtirokchi davlatlari harbiy shaharcha hududiga ko‘chat ekdi

40

Bugun, 14-avgust kuni V “Xalqaro armiya o‘yinlari – 2019” doirasida “Forish” tog‘ poligonida o‘tkazilgan “Harbiy-tibbiy estafeta” tanlovining yakuniy shartlari ham o‘z nihoyasiga yetdi.

Kunning ikkinchi qismida O‘zbekiston Mudofaa vazirining tarbiyaviy va mafkuraviy ishlar bo‘yicha o‘rinbosari general-mayor Azizbek Ikramov boshchiligida Rossiya, Ozarbayjon, Angola, Armaniston, Belarus, Vetnam Zimbabve, Qozog‘iston, Tojikiston, Myanma kabi ishtirokchi hamda kuzatuvchi maqomidagi Venesuela davlatlarining vakillari “Forish” tog‘ poligoni harbiy shaharchasi hududiga ko‘chat ekdi.

Ushbu navnihol 2019-yilning avgust oyida O‘zbekistonda ilk bor o‘tkazilgan Xalqaro armiya o‘yinlarida ishtirok etgan 12 davlat o‘rtasidagi hamdo‘stlik, birodarlik, tinchlik va ezgulik timsoli sifatida bo‘y cho‘zishi niyat qilindi.

Shundan so’ng barcha ishtirokchi davlat vakillari ishtirokida matbuot anjumani o’tkazildi. Ularga ArMI 2019 o’yinlari davomida qayd etilgan natijalar va «Harbiy-tibbiy estafeta» tanlovi bo’yicha ma’lumotlar berildi.

Mudofaa vazirligi Axborot va ommaviy kommunikatsiyalar departamenti