Jamoalar “Harbiy-tibbiy estafeta” tanlovining o‘tkazilish tartibini kelishib oldi

47

“Forish” tog‘-dala poligonida “Xalqaro armiya o‘yinlari – 2019” doirasida ishtirokchi va kuzatuvchi maqomidagi chet el harbiy delegatsiyalari boshliqlari “Harbiy-tibbiy estafeta” tanlovining o‘tkazilish tartibi haqida kelishib oldilar.

Unda asosiy e’tibor “Harbiy-tibbiy estafeta” tanlovining muhim jihatlari, o‘ziga xos murakkabliklari, reglamenti, tanlov nizomiga ko‘ra shartlarning muhim elementlarini bajarish ketma-ketligiga qaratildi.

Hudud hamda ushbu nufuzli musobaqani o‘tkazish uchun barpo etilgan dala-o‘quv maydonining joylashuvi va xususiyatlaridan kelib chiqib, jamoalar ayrim kichik elementlarga bir ovozdan juz’iy o‘zgartishlar kiritishni ma’qul ko‘rishdi.

Mudofaa vazirligi axborot va ommaviy kommunikatsiyalar departamenti “Harbiy-tibbiy estafeta” tanlovida ayni damda kuzatuvchi davlat maqomida qatnashayotgan Venesuela Respublikasi vakili, tibbiy xizmat polkovnigi Aylin Del Gonsales xonimning mulohazalarini qayd etdi:

– Venesuelalik kuzatuvchi sifatida “Harbiy-tibbiy estafeta” tanloviga nisbatan taassurotlarim ulkan. Mazkur poligonning tanlov o‘tkazishga oid barcha tashkiliy jihatlarini o‘rganib chiqdim. Mutassaddilardan o‘zimni qiziqtirgan ko‘plab savollarga yetarli darajada javob oldim. Biz, kuzatuvchi sifatida yurtingizda bu tanlov uchun yuqori saviyada tayyorgarlik ko‘rilganidan mamnun bo‘ldik. Kelgusi yilda “Harbiy-tibbiy estafeta” tanlovida qatnashish niyatidamiz, – dedi Gonsales xonim.

Eslatib o‘tamiz, mazkur nufuzli musobaqaning tantanali ochilish marosimi joriy yilning 4 avgust kuni bo‘lib o‘tadi.

Mudofaa vazirligi axborot va ommaviy kommunikatsiyalar departamenti