“Tong”ga “Harbiy-vatanparvarlik karvoni” tashrif buyurdi

36

Bola beg‘ubor, uning kulgusida dunyo shodliklari mujassam. Shuning uchunmi, bolajonning sho‘xliklari dilga ozor bermaydi, qalbga zavq bag‘ishlaydi. Mudofaa vazirligiga qarashli “Tong” bolalar sog‘lomlashtirish oromgohi ham bugun mana shunday beg‘uborliklar makoniga aylangan. “Biz buyuk yurt farzandlarmiz” shiori ostida tashrif buyurgan “Harbiy-vatanparvarlik karvoni” esa kichkintoylarning yozgi ta’til pallasi maroqli o‘tishini ta’minladi.

Mudofaa vazirligi tarbiyaviy va mafkuraviy ishlar bosh boshqarmasi tashabbusi bilan tashkil etligan “Harbiy-vatanparvarlik karvoni”da Qurolli Kuchlar akademiyasi, Toshkent viloyati yoshlar ittifoqi mas’ul xodimlari qatnashdi. Mudofaa vazirligi sport klubi, “Impuls” ansambli hamda “Turon” yoshlar teatr guruhlarining chiqishlari yig‘ilganlarda katta taassurot qoldirdi.

Oromgohda davlatimiz rahbari tomonidan ilgari surilgan besh tashabbus doirasida tashkil etilgan “Drama”, “Raqs”, “Informatika”, “Yosh kitobxon”, “Musiqa”, “Yosh rassom”, “Jit kun do”, “Suzish”, “Dzyudo” “Yosh futbolchi”, “Volleybol”, “Shaxmat va shashka” kabi to‘garakalar bolajonlar bilan gavjum.

“Harbiy-vatanparvarlik karvoni” doirasida o‘tkazilgan “Eng bilimdon kitobxon”, “Dunyo bolajonlar nigohida” tanlovida faol qatnashganlar Mudofaa vazirligi va Toshkent viloyati yoshlar ittifoqi kengashining esdalik sovg‘alari bilan taqdirlandi. “Tong” va “Humo” oromgohlari bolalari o‘rtasida o‘tkazilgan mini futbol musobaqasida esa do‘stlik g‘alaba qozondi.

Tadbir davomida Mudofaa vazirligiga qarashli “Impuls” ansambli hamda Toshkent shahar “Turon” yoshlar teatr guruhi a’zolari tomonidan namoyish etilgan konsert dasturi barchaga ko‘tarinki kayfiyat ulashdi.

Mudofaa vazirligi Axborot va ommaviy kommunikatsiyalar departamenti